tarascon

TARASCON, ville de Provence, assise és confins d'icelle sur le rosne vis à vis de Beaucaire, ville faisant à l'opposite un limite du pays de Languedoc, icelles deux villes separées par ladite riviere de Rosne courant entre deux, dont est le dicton usité parmi les gens d'icelles, Entre Beaucaire et Tarascon ne paist ne brebis ne mouton, Tarasco, Ceste ville est ramenteuë en plusieurs escrits des hommes doctes de cest aage, pour la rare pieté, saincteté de moeurs et sçavoir aux lettres Latines de soeur Scholastique Bectone abbesse des Nonains dudit lieu, laquelle avoit tant profité en la lecture de Ciceron et d'autres auteurs signalez ses contemporanées, que les escrits d'elle estoyent parangonnez à ceux des plus grands Ciceroniens de son temps. La renommée dequoy meut le Roy François premier et la Royne de Navarre sa soeur, tous deux grands zelateurs des personnes lettrées, d'aller sur le lieu pour la voir, ce que Guillaume Bude, le lustre de ce royaume, Macrin et plusieurs autres de ceste marque firent aussi pour mesme occasion, la vie d'elle a esté mise par escrit par Lodovico Domenichi, en son livre, De la nobilta d'elle donne.

Qui est de Tarascon, Tarasconensis.

Thresor de la langue françoyse. Jean Nicot.